तुझ्या माझ्यातली अंतरं
मनाला हूरहूर लावणारी
आठवणींमधे भिजणारी मी
अन् बाहेर शांत बरसणार्‍या सरी

राग, प्रेम, लोभ, खंत हे सारं

मी सहसा व्यक्त करत नाही

पण म्हणून माझ्यातलं त्यांचं अस्तित्व

नाकारता येत नाही...

देहामधे कुठेतरी दडलेलं
इवलंसं मन
त्यामधे दाटणारी मात्र
तुझी आभाळाएवढी आठवण.

तु़झं फक्त असणंच
माझ्यासाठी बरंच काही असतं
आणि तू नसताना मात्र
माझं असं इथे काहीच नसतं...

आयुष्य...
कधी कौलांवरुन ओघळणार्‍या पागोळ्यांगत
कधी खळखळणारा निर्झर अविरत......
कधी बहरलेला गुलमोहोर अंगणीचा
कधी कोमेजला जीव उमलत्या कळीचा......

कधी दवात भिजली चिंब कोवळी पाती
कधी सावरलेला अळवावरचा मोती......
कधी रंगभरले इंद्रधनू आकाशीचे
कधी नुसतीच उलगडणारी कोरी पाने.....

कधी वार्‍यावर वाहणारी मंद धुंद बासरी
कधी तहानलेल्या चातकाची आरोळी......
कधी थवा पक्ष्यांचा दूरदेशी जाणारा
कधी गरुड एकला ऊंच झेपावणारा.....

कधी सतत बोचणारे काटे
पांघरता शाल मखमली
कधी अनवाणी चालून थकता
त्रुप्त करणारी सावली......

Photo Courtsey